Friday, January 27, 2012

உள்ளத்தில் குழந்தை

உலக இலக்கியங்களை காணும் போதெல்லாம் நமக்கு எதற்கு இந்த வேண்டாத வேலை என்று விலகிவிடுவது என் வழக்கம். ஆர்வமிகுதியால் அவ்வப்போது சில புத்தகங்களை படிக்க ஆரம்பித்து பின்னர் கைவிட்டது பல முறை நிகழ்ந்திருக்கிறது. ஆனாலும் அப்படி அவற்றில் என்னதான் இருக்கிறது அது ஏன் நமக்கு மட்டும் புரியாமல் இருக்கிறது ஒரு முறையாவது ஒரு புத்தகத்தை முழுமையாக படித்துவிட வேண்டும் என்ற எண்ணம் மட்டும் மனதில் இருந்துகொண்டே இருந்தது.

”உள்ளத்தில் குழந்தை” இந்த புத்தகத்தை படித்துவிடலாம் என்று துணிவு ஏற்பட முக்கிய காரணம் புத்தகத்தின் அளவு. மிகவும் சிறிய நூல்தான். சரி இந்த முறை ஒரு உலக இலக்கியத்தை படித்துவிட வேண்டியதுதான் என்று ஆரம்பித்ததும் முதல் பத்து பக்கங்கள் வரை புரியாத பெயர்கள், புரியாத சூழல்கள் என ஒன்றுமே புரியவில்லை... விடாபிடியாக தொடர்ந்து படிக்க படிக்க ஏன் இந்த புத்தகத்தை மொழி பெயர்த்திருக்கிறார்கள் என்ற காரணம் புரிந்தது. மிகவும் எளிமையான, அழகான கதை. கொஞ்சம் ஆர்வம் மட்டும் இருந்தால் போது உங்களை தன் போக்கில் இழுத்துச்சென்றுவிடக்கூடிய அற்புதமான வர்ணனைகளுடன் கதை நகர்கிறது.

வெளிநாடு செல்லும் ஒருவன் அங்கு சந்திக்கும் ஒரு அண்ணன் மற்றும் அவருடைய தங்கை என மூன்று பேர்களை மட்டுமே அடிப்படையாக கொண்டு இயங்கும் கதை. மூன்று பேரின் உணர்வுகளை மட்டுமே கதையின் போக்காக செல்கிறது. இத்தனைக்கும் இது ஒரு காதல் கதை கூட இல்லை. காதலிக்கலாமா வேண்டாமா என அந்த கதாபாத்திரம் முடிவு எடுப்பதே கதையின் இறுதியாக இருக்கிறதே தவிர, காதலை பக்கம் பக்கமாக விளக்கும் கதை இல்லை இது. காதலும் இல்லை, நட்பும் இல்லை, விரோதமும் இல்லை, ஏதோ ஒன்றை தேடிச்செல்லும் நடவடிக்கைகளும் இல்லை பின்னே நாவலி என்னதான் இருக்கிறது! உணர்வுகள் அதை நீங்கள் இந்த புத்தகத்தை படிக்கும் போது உணர்ந்துகொள்வீர்கள்.



புத்தகத்தின் பெயர் : உள்ளத்தில் குழந்தை

ஆசிரியர் : இவான் துர்கேனிவ்

தமிழாக்கம் : தஸ்லிமா

வெளியீடு : சாஹித் @ ஹாமித் பப்லிஷர்ஸ்

Friday, April 2, 2010

கொஞ்ச நாட்களுக்கு முன்புவரை நோய்கள் பற்றிய ஒரு தெளிவான சிந்தனை அனைவரிடமும் இருந்தது. எனக்கு இரண்டு நாட்களாக ஒரே தலைவலி மருத்துவரிடம் செல்ல வேண்டும். ஒரு வாரமாக வயிற்று வலிக்கிறது, என்ன செய்தால் குணமாகும்... என்பது போன்ற பேச்சுக்கள்தான் இருந்தது. ஆனால் சமீபகாலமாக இந்த பேச்சுக்களை முற்றிலும் மாறிவிட்டது. என்னென்னே தெரியல இரண்டு நாட்களாக உடம்பு சரியில்லாததுபோல் இருக்கிறது மருத்துவரிடம் செல்ல வேண்டும். அந்த பையனுக்கு என்ன உடம்புக்கு – தெரியல அடிக்கடி உடல்நிலை சரியில்லாமல் போகிறது மருத்துவரிடம் செல்ல வேண்டும்.... இப்படி மாறிவிட்டது மக்களின் நோய்பற்றிய பேச்சுகள். அதாவது முன்பு தனக்கு என்ன நோய் ஏற்பட்டுள்ளது என்ற தெளிவான சிந்தனை மக்களிடம் இருந்தது. இப்போது தனக்கு என்ன விதமான நோய் ஏற்பட்டுள்ளது என்று யாராலும் புரிந்துகொள்ள முடியவில்லை இதனால் மருத்துவர் சொல்வதை அப்படியே தலையாட்டி கேட்க வேண்டிய நிலை உருவாகிவிட்டது.

சமீபத்தில் என்னுடன் பணியாற்றுபவரின் இரண்டு சிறு வயது குழந்தைகளை அவசர சிகிச்சை பிரிவில் அனுமதித்திருந்தார்கள். இரண்டுவார காலம் அவசரசிகிச்சை பிரிவிலேயே வைத்திருந்துவிட்டு வீட்டுக்கு அனுப்பினார்கள். என்ன விசயம் என்று விசாரித்ததில் – நல்லாதான் இரண்டு பேரும் விளையாடிக்கொண்டு இருந்தார்கள் லேசாக தலை சுடுவதுபோல் இருந்தது, சரி காய்ச்சல் வந்திருக்குமோ என்ற சந்தேகத்தில் மருத்துவரிடம் அழைத்துச்சென்றேன். உடனடியாக அவசரசிகிச்சை பிரிவில் அனுமதிக்க வேண்டும் என்று சொல்லி சிகிச்சையை ஆரம்பித்துவிட்டார்கள். என்ன நோய் என்று கேட்டபோது ஏதோ வைரஸ் காய்ச்சல் என்று சொன்னார்கள்... இப்போதைய நிலமை இப்படித்தான் இருக்கிறது சாதாரணமான தலைவலி, வயிற்றுவலி என்று சொல்லிக்கொண்டு யாரும் மருத்துவரிடம் செல்வதில்லை தங்களுக்கு என்ன நோய் வந்தாலும் அந்த நோயின் பெயருடன் வைரஸ் என்ற வார்த்தையை இணைத்துக்கொள்ள வேண்டிய கட்டாயம் இப்போது உண்டாகிவிட்டது.

இப்போதைய சூழ்நிலையில் வைரஸ் நோய் பற்றி நாம் அறிந்து வைத்திருக்க வேண்டியது மிக அவசியமான ஒன்று. அந்த அவசியத்தை பூர்த்தி செய்யும் விதமான புத்தகம் இது. இந்த புத்தகத்தில் ஒருவரை பற்றி நமக்கு அறிமுகப்படுத்தும் விதத்தில் ஒவ்வொரு வைரஸ் பற்றியும் ஆசிரியர் நமக்கு அறிமுகப்படுத்தி வைக்கின்றார். பல வைரஸ்களின் பெயர்கள் நமக்கு புதிதாகவும், புரியாததாகவும் உள்ளது. ஏதோ ஒரு அறிவியல் பாடப் புத்தகத்தை படிப்பது போன்ற உணர்வு ஏற்படுகிறது. இந்த வைரஸின் பெயர் இது, இது இப்படித் தோண்றும், இப்படி வளர்ச்சியடையும், இது போன்ற பாதிப்புகளை உண்டாக்கும், அதில் இருந்து நாம் நம்மை தற்காத்துக்கொள்ள என்ன செய்ய வேண்டும்... இந்த முறையை அடிப்படையாக வைத்தே அனைத்து வைரஸ்கள் பற்றியும் எழுதியிருக்கிறார் ஆசிரியர். இப்படி பாட புத்தக வடிவில் இல்லாமல் நடைமுறை வாழ்வியல் தொடர்பான பிரச்சனைகளுடன் இணைத்து சுவாரஸ்யமாக எழுதியிருந்தால் இன்னும் நன்றாக இருந்திருக்கும்.

பல வைரஸ்களின் பெயர்கள் நமக்கு புரியாவிட்டாலும் ஒரு சில வைரஸ்கள் நமக்கு முன்பே அறிமுகமானவைதான். உதாரணமாக அம்மை நோய்களை உண்டாக்கும் வைரஸ் பற்றி படிக்கும் போது பல விசயங்களை தெரிந்துகொள்ள முடிகிறது. அம்மை நோய் என்றது வேப்பிலை, மாரியம்மன் கோவில், வாசலில் ஒரு குடத்தில் வேப்பிலையோடு வைத்திருந்து குளிக்கப்பயன்படுத்தும் தண்ணீர் போன்றவைகள்தான் நமக்குத்தெரியும். ஆனால் அவற்றின் அடிப்படை விசயங்களில் இருந்து முழுமையான ஒரு விபரத்தை இந்த புத்தகத்தின் மூலம் தெரிந்துகொள்ள முடிகிறது.

மற்றொரு நோய் போலியோ, போலியோ என்றதும் எனக்கு ஞாபகம் வருவது முன்பு கருப்பு வெள்ளை தொலைக்காட்சி பார்த்துக்கொண்டிருந்த காலத்தில், சினிமாவிற்கு இடையே போலியோவால் பாதிக்கப்பட்ட குழந்தைகளை காண்பிப்பார்கள். கால்களில் செயற்கையாக சில விசயங்களை பொருத்திக்கொண்டு நடக்க முடியாமல் குழந்தைகள் நடந்து வருவார்கள் அவர்களை அரவணைத்துக்கொண்டு ரஜினிகாந்த் போலியோ சொட்டு மருந்து கொடுக்க வேண்டிய அவசியம் பற்றி பேசுவார். போலியோ பற்றி நான் அறிந்து வைத்திருக்கும் விசயம் அவ்வளவுதான். இந்த புத்தகத்தின் மூலமாக போலியோ பற்றி முழுமையாக தெரிந்துகொள்ள முடிந்தது. அதுபோல் தான் எய்ட்ஸ் பற்றிய விபரங்களும். எய்ட்ஸ் நோயாளிகளும் நம்மைபோன்றவர்கள்தான் அவர்களை நாம் ஒதுக்கக்கூடாது, கைகளை தொடுவதால், அவர்களுடன் பழகுவதால் நமக்கு நோய் பரவாது என்று தொலைக்காட்சியில் காண்பிக்கப்பட்டாலும் நமக்கு ஒரு அச்சம் இருக்கத்தான் செய்கிறது. இந்த புத்தத்தில் எய்ட்ஸ் பற்றி காரண காரியங்களோடு படிக்குக்கும்போது அந்த அச்சம் நம் மனதிலிருந்து விலகிவிடுகிறது

பல நோய்களை பற்றி படித்தாலும் அவற்றால் எனக்கு பாதிப்பு ஏற்படாததால் அவற்றின் அர்த்தங்கள் புரியவில்லை. ஆனால் சிக்குன் குன்யா பற்றி படிக்கின்றபோது மிகுந்த ஆர்வத்துடன் படித்தேன் ஏனெனில் இரண்டு முறை சிக்குன் குன்யாவால் பாதிக்கப்பட்டு இருக்கின்றேன். சிக்குன் குன்யா வராமல் இருக்க இந்த ஊசியை போட்டுக்கொள்ளுங்கள், எங்களின் இயற்கையான இந்த மருந்துகளை பயன்படுத்தினால் சிக்குன் குன்யா வராமல் தடுக்க முடியும் என்பது போன்ற பல விளம்பர பலகைகளை நான் பார்த்திருக்கின்றேன். சிக்குன் குன்யா பற்றிய விபரம் என்றது நான் தேடியது, இந்த நோய்யை சரி செய்ய என்ன செய்ய வேண்டும் என்பதை பற்றித்தான். ஆனால் இந்த நோய்க்கு இன்னும் மருந்து கண்டுபிடிக்கப்படவில்லை என்பதை இந்த புத்தகத்தின் மூலமாக தெரிந்துகொண்டேன். இந்த விசயம் எனக்கு அதிர்ச்சியாக இருந்தது. மருத்துவர்கள் இதுவரை கொடுத்துக்கொண்டிருப்பது இந்த நோயினால் ஏற்பட்ட பாதிப்புகளை சரிசெய்ய மட்டுமே பயன்படுமாம்.

இந்த புத்தகத்தில் மிக முக்கியமானது முதலாவது அத்தியாயமான வைரஸ் பற்றிய அறிமுகமும், எந்தெந்த நேரங்களில் எப்படி செயல்பட வேண்டும் என்ற ஆலோசனைகள் அடங்கிய இறுதி அத்தியாயமும் அனைவரும் அறிந்துகொள்ள வேண்டிய முக்கியமான பகுதிகள் ஆகும். மற்ற விபரங்கள் பலவிதமான வைரஸ்கள் பற்றிய அறிமுகம் மட்டுமே. இந்த புத்தகத்தை விலைக்கு வாங்க இங்கே செல்லுங்கள்: http://nhm.in/shop/978-81-8493-109-9.html

Tuesday, March 2, 2010

மருதமலைக்கு மிக அருகில் வசித்த சமயத்தில் அடிக்கடி மருதமலைக்கு செல்லும் வாய்ப்பு கிடைத்தது. இதனால் மருதமலைக்கு செல்வது தொடர்பாக யாராவது சந்தேகம் கேட்டால் விபரமாக சொல்லிவிடுவேன். இதனால் மருதமலை பற்றி எல்லா விசயங்களும் எனக்கு தெரியும் என்ற நினைப்பில் இருந்தேன். சமீபத்தில் மருதமலை தொடர்பாக இணைய தளத்தில் செய்திகளை படித்துக் கொண்டிருந்தபோது, மருதமலை என பெயர் வரக் காரணம் என்ன என தெரிந்தபோது மிக ஆச்சரியமாக இருந்தது! மருத மரங்கள் அங்கிருப்பதால் மருதமலை என பெயர் வந்ததாம். பல முறை அங்கு நான் போயிருந்தாலும் ஒருதடவை கூட மருத மரங்களை பார்த்ததில்லை. இதன் மூலமாக நான் தெரிந்து கொண்டது என்னவென்றால் ஒரு இடத்திற்கு பல முறை சென்றிருந்தாலும், அந்த இடத்தைப் பற்றி முழுமையாக நம்மால் தெரிந்துகொள்ள இயலாது. எனவே ஒரு இடத்திற்கு செல்வதற்கு முன்பாக அந்த இடத்தைப் பற்றிய சிறப்புகளை கொஞ்சமாவது படித்துவிட்டு சென்றால் நம் பயணம் முழுமையடையும். எனக்கு ஏற்பட்ட இந்த அனுபவம் மருதமலைக்கு செல்வதில் மட்டுமல்ல சென்னைக்கு செல்வதற்கும் பொருந்தும்.

புத்தக்தை படித்துக்கொண்டிருக்கும் போதே ஆசிரியர் நந்திதா கிருஷ்ணா நம்முடைய நினைவிற்கு நிஞ்சயம் வருவார். காரணம் இந்த புத்தகத்தில் அவர் எழுதியிருப்பது அவருடைய சொந்த கருத்துக்களோ, கற்பனையான விசயங்களோ அல்ல, என்ன உள்ளதோ அதை அப்படியே எழுதியிருக்கிறார். அதைத் தவிர அதிகப்படியாக வேறு எதையும் எழுதவில்லை. ஒரு ஆய்வறிக்கையை படிப்பதுபோல புள்ளி விபரங்களுடன் மிகத்தெளிவாக எழுதியிருக்கிறார். இவ்வளவு விசயங்களை உண்மையாக தெரிந்துகொள்ளாமல் எழுத இயலாதே! இதற்காக ஆசிரியர் ஒரு ஆராய்சியே செய்திருப்பார் என்று நினைத்துகொண்டு கடைசி பக்கத்தை பார்த்தால் உண்மையிலேயே ஆசிரியர் ஒரு ஆய்வாளரே என்ற செய்தி ஆச்சரியப்படுத்துகிறது. உதாரணமாக கூவம் நதி பற்றி எழுதும்போது அதையொட்டி அமைந்துள்ள சிவன் கோவில் ஆவணம் பற்றி ஆசிரியர் சொல்லி அதன் மூலமாக கூவம் நதியை பற்றி விளக்கியிருபதில் ஆசிரியரின் ஆய்வு பற்றி புரிகிறது. 25 ரூபாய் புத்தத்தில் அந்த தொகையைவீட அதிகமாகவே உழைப்பு இருக்கிறது என்பதில் சந்தேகமில்லை.

சென்னை வெய்யிலில் கடுப்பாகிய ஒருவன் கண்களை மூடி அமர்ந்து, சென்னை எப்படி இருக்க வேண்டும் என்று கற்பனை செய்தால், அந்த கற்பனையில் என்னென்ன காட்சிகள் வருமோ அப்படித்தான் ஆரம்பத்தில் சென்னை இருந்ததாம்! சாலையின் இருபுறமும் மரங்கள் இருந்தனவாம், பலவிதமான தோப்புகள் இருந்தனவாம், நாம் எவ்வளவு அழிவுகளை ஏற்படுத்தி விட்டோம் என்பதை உணர முடிகிறது. வெரும் வியாபார சிந்தனை மட்டும் மேலோங்கி இருந்தால் ஒரு நகரம் என்ன நிலையை அடையும் என்பதை தெளிவாக உணர முடிகிறது.

புத்தகத்தில் இதுவரை நான் அறிந்திராத பல பொது அறிவு விசயங்களையும் ஆசிரியர் சம்பந்தப்பட்ட இடங்களில் எழுதியிருக்கிறார். அதை படிப்பதற்கு புதுமையாக இருந்தது. நமது மாநில மரம், மாநில மலர், மாநில விலங்கு, மாநில பறவை என பலவிதமான பொது அறிவு விசயங்களும் புத்தகத்தில் உண்டு.

சென்னையின் வியர்வையிலும், புழுதியிலும் அதன் வரலாறு மறைந்து விட்டது அல்லது அவற்றை மக்கள் மறந்துவிட்டார்கள் என்றுதான் நினைக்கிறேன். சென்னை இவ்வளவு வரலாற்று சிறப்பு மிக்க நகரமா! என ஆச்சரியம் உண்டாகிறது. சென்னையில் உள்ள ஒவ்வொரு விசயத்திற்கும் ஒரு வரலாற்று அர்த்தம் இருக்கிறது என்பதை ஆசிரியர் ஆணித்தரமான விசயங்களால் விளக்கும் போது வியப்பு உண்டாகிறது.

ஏதோ ஒரு கோவிலுக்கு சென்றோம் சாமியை கும்பிட்டோம் என்ற சிந்தனைதான் பெரும்பாலானவர்களுக்கு இருக்கும். ஆனால் ஒரு ஊரில் கோவில் எதற்கு இருக்கிறது அதனால் அந்த ஊருக்கு என்ன நன்மை என்பதை அறிவியல் பூர்வமாக ஆசிரியர் விளக்கியிருப்பது அருமையாக உள்ளது. பழங்கால மக்களின் அறிவை எண்ணி ஆச்சரியப்படாமல் இருக்க இயலாது. ஒரு கோவில், அதற்கு ஒரு குளம், அந்த குளம் நோக்கியபடி அந்த ஊரில் உள்ள வீடுகளின் மேற்கூறை அமைந்திருக்கும் இதன் மூலமாக மழை நீர் முழுவதும் அந்த குளத்தில் சேருகிறது. இதனால் அந்த ஊரில் உள்ள அனைத்து கிணறுகளிலும் தண்ணீர் அதிகரிக்கிறது. ஊரில் நிலத்தடி நீர்மட்டம் உயர்கிறது... என்று ஆசிரியர் சொல்லிக்கொண்டேபோக அந்த காலத்து மக்கள் அர்த்தமில்லாமல் எதுவும் செய்ய வில்லை என்று புரிகிறது. மேலும் நம்மால் நாகரீகம் என்ற பெயரில் கட்டிடங்களின் வடிவங்கள் மாற்றியமைக்கப்பட்டதும் அதனால் ஏற்பட்ட விளைவுகளையும் ஆசிரியர் தெளிவாக விளக்கியிருக்கிறார்.

வெரும் புலம்பலாக மட்டும் இல்லாமல் பிரச்சனைகளுக்கு உண்டான தீர்வையும் ஆசிரியர் சொல்லியிருப்பது புத்தகத்திற்கு மேலும் மதிப்பை அதிகரிக்கிறது. சரி எல்லாம் முடிந்து விட்டது இனி கவலைப்பட்டு எதுவும் ஆகப்போவதில்லை இனி என்ன செய்யலாம் என்ற நிலை வருகையில் கொஞ்ச நாள் பரபரப்பாக நம்மால் பேசப்பட்ட மழைநீர் சேகரிப்பை கட்டாயமாக பயன்படுத்த வேண்டும் அப்போதுதான் எதிர்கால பிரச்சனைகளை நம்மால் சமாளிக்க இயலும் என்று ஆசிரியர் சொல்லும் போது இது சென்னைக்கு மட்டுமல்ல அனைத்து பகுதிகளுக்கும் பொருந்தும் என்ற எண்ணம் தோண்ருகிறது. புத்தகத்தின் ஒவ்வொரு பகுதியிலும் அந்த பகுதிக்கு பொருத்தமான அழகிய ஓவியங்கள் வரையப்பட்டுள்ளதன் மூலம் ஒவ்வொரு பகுதியில் சொல்லப்படும் விசயங்களை நம்மால் காட்சிப்படுத்தி பார்த்துக்கொள்ள முடிகிறது.

மிகக்குறைந்த விலையில் கிடைக்கும் இந்த புத்தகத்தில் மிக அதிகமான அறிய விசயங்கள் அடங்கியிருக்கிறது என்பதில் சந்தேகமில்லை. அழகிய மற்றும் அர்த்தமுள்ள இந்த புத்தகத்தை வாங்க இங்கே செல்லுங்கள்: http://nhm.in/shop/978-81-8493-253-9.html

Sunday, February 7, 2010

இந்த புத்தகத்தில் படிப்பதற்கு என்ன இருக்கப்போகிறது! மாயாவதி பற்றி படித்து நாம் என்ன செய்யப்போகிறோம்! என்று நினைத்து இந்த புத்தகத்தை நீங்கள் படிக்காமல் விட்டு விட்டால், ஒரு விறுவிறுப்பான அரசியல் புத்தகத்தை படிப்பதற்கான வாய்ப்பை இழந்து விடுவீர்கள். அமைதிப் படை படத்தில் சத்தியராஜ் ஒரு வசனம் சொல்வாரே “நாம முன்னேறனும்னா நாயா இருந்தாலும் மனுசனா இருந்தாலும் ஏறி மிதித்துவிட்டு போய்கிட்டே இருக்க வேண்டியது தானே” இந்த புத்தகத்தின் கடைசியில் உள்ள சில அத்தியாயங்களை படிக்கும்போது நிஜ அரசியலும் அப்படித்தான் இருக்கிறது என்பது உங்களுக்கு புரியும். கொள்கைகள் கோட்பாடுகள் என்று எதுவுமில்லை இப்போதைய அரசியலில். காரியம் ஆக வேண்டும், அதற்காக என்ன செய்ய வேண்டும், யார் யாரிடம் பணிந்து போக வேண்டும் என்பதை அடிப்படையாகக் கொண்டே நம் அரசியல் இயங்கிக்கொண்டிருக்கிறது என்பது தெளிவாக புரிகிறது.

ஒரு மிகச்சிறந்த சதுரங்க ஆட்டத்தை வேடிக்கைப்பார்த்தால் எவ்வளவு சுவாரசியமாக இருக்குமோ, அவ்வளவு சுவாரசியமாக இந்த அரசியல் சதுரங்கத்தை பற்றி எழுதியுள்ளார் ஆசிரியர். முதலில் வரும் நான்கு ஐந்து அத்தியாயங்கள் வழக்கமாக வரும் பிறப்பு, வளர்ப்பு பற்றியது. ஆனால் அதற்கு பின் அரசியல் ரீதியாக வரும் அத்தியாயங்கள் உண்மையிலேயே மிகவும் விறுவிறுப்பாக பல திருப்பங்களுடன் செல்கிறது.

முன்னேறியவர்களின் வாழ்க்கையை படிக்கும் போது ஒரு விசயம் புரிகிறது. சிறுவயதில் அவர்களை முன்னேறத் தூண்டும் வகையில் பல சம்பவங்கள் நடந்திருக்கிறது. ஆச்சரியப்படும் விதமாக அந்த சம்பவங்கள் நம் வாழ்விலும் நடந்திருக்கிறது. ஆனால் அவர்களுக்கும் நமக்கும் எங்கு வித்தியாசம் ஏற்படுகிறது என்றால், அந்த சம்பவங்களை அடிப்படையாகக் கொண்டு அவர்களின் செயல் முறையையே மாற்றிக்கொண்டு விடுகிறார்கள். அதை ஒரு முக்கியமான நிகழ்வாக எடுத்துக்கொள்கிறார்கள். பெரும்பாலானவர்கள் அந்த நிகழ்வுகளை ஒரு சிறு பிரச்சனை என்ற அளவிலேயே அனுகி அதை அத்தோடு மறந்துவிடுகிறார்கள். மாயாவதியின் வாழ்விலும் பல சம்பவங்கள் நிகழ்ந்துள்ளன ஆனால் அவை அனைத்து தலித்துகளின் வாழ்வில் நிகழ்ந்தவைதான். அந்த நிகழ்வுகளை மாயாவதி எப்படி அனுகியிருக்கிறார், அந்த நிகழ்வுகளை அடிப்படையாகக் கொண்டு தன்னுடைய வாழ்வை எப்படி மாற்றியிருக்கிறார் என்பதுதான் அவரின் முன்னேற்றத்திற்கு காரணமாக அமைந்திருக்கிறது.

ஒரு சிலருக்கு முன்னேறுவதற்கான அனைத்து விசயங்களும் சரியாக அமைந்தாலும் அவர்களை வழி நடத்த சரியான ஆள் இல்லாமல் தோல்வியடைந்துவிடுவார்கள். மாயாவதிக்கு அப்படியொரு நிகழ்வு நிகழவில்லை, காரணம் கன்ஷிராம் என்றோரு அருமையான குரு மாயாவதிக்கு அமைந்திருக்கிறார். பொதுவாக அரசியலில் வாரிசு போல இருப்பவர்கள், தங்களுடைய குருவை ஏதாவது ஒரு வகையில் மிஞ்சி விடுவார்கள். வளர்ந்த பிறகு திடிரென்று கட்சி மாறிவிடுவது அல்லது புதியதாக கட்சி ஆரம்பித்து தனக்கு அரசியல் சொல்லிக்கொடுத்தவரின் காலை வாரி விடுவது வழக்கம். ஆனால் கன்ஷிராம் விசயத்தில் அப்படி நடக்காததற்கு மாயாவதி மிக நல்லவர் என்று அர்த்தமில்லை, பிரம்மிக்க வைக்கும் கன்ஷிராமின் திட்டமிடல்தான் கடைசிவரை அவர் நிலை தடுமாறாமல் அரசியலில் இருக்க காரணமாக அமைந்திருக்கிறது. அவரை புரிந்துகொள்ள அவர் சொன்ன ஒரு வாக்கியமே போது “என் கனவுகள் மிகப் பெரியவை” .

தமிழ் நாட்டு அரசியலே பெரிய தலைவலியாக நினைத்துக்கொண்டிருக்கும் நமக்கு உத்திரப்பிரதேச அரசியல் நிலவரம் படிக்கும்போது நம்ம ஊர் அரசியல் பதட்டமெல்லாம் சாதாரண விசயம் என்று புரிகிறது. மாயாவதியை கன்ஷிராம் சந்தித்தது முதல் அவர்கள் சம்பந்தப்பட்ட விசயங்களை படிக்கும் போது, இப்படி இருக்க வாய்ப்பே இல்லையே மற்றவர்கள் சும்மா இருக்க மாட்டார்களே! ஏதாவது பிரச்சனையை உருவாக்குவார்களே! என சிந்தித்துக்கொண்டு படிக்கும்போதே அடுத்த அத்தியாயங்களில் வந்து விடுகிறது வழக்கமான பிரச்சனைகள். மாயாவதிக்கும் கன்ஷிராமுக்கும் உள்ள உறவு பற்றிய விமர்சனங்கள்... ஊர் மாறினாலும், அரசியல் மாறினாலும் மக்களின் பொதுவான சிந்தனை மாறாது என்பதற்கு இது ஓர் உதாரணம்.

”கோடிக்கணக்கில் பணம் செலவழித்து தனக்கு சிலை வைக்கிறார் மாயாவதி” என்ற செய்தியை படித்ததும், இப்போதுள்ள அரசியல்வாதிகளை தட்டிக்கேட்க ஆள் இல்லை எனவே அப்படித்தான் நடந்துகொள்வார்கள். அப்படி நடந்துகொண்டாலும் இந்த மக்களெல்லாம் அவர்களுக்குத்தானே ஓட்டு போடுகிறார்கள் – என்ற சிந்தனை நம் மனதில் எழுவது இயல்பு. இப்படி யோசிக்கும் நாம் மாயாவதியை பற்றி ஏதாவது தெரிந்து வைத்திருக்கிறோமா! என்று யோசித்தால் அந்த கேள்விக்கு நம்மிடம் பதில் இருக்காது. மாயாவதியை பற்றி மட்டுமல்ல இந்தியாவில் தற்போதுள்ள எந்த அரசியல்வாதியை பற்றியும் முழுமையாக நமக்கு தெரியாது என்பதுதான் உண்மை. அப்படி அவர்களை பற்றி நாம் முழுமையாக தெரிந்து கொண்டால், அவர்களின் சூழ்நிலையை புரிந்துகொண்டால், அவர்களின் நடவடிக்கைகளை விமர்சனம் செய்வோமா! அல்லது இப்போதுள்ள அளவிற்கு கடுமையான விமர்சனங்கள் இருக்குமா! என்றால் அதில் சந்தேகமே. மாயாவதி புத்தகத்தை படித்ததும் எனக்கு அப்படித்தான் தோண்றுகிறது.

அரசியலை பொருத்த வரையில் எங்கு எது நடந்தாலும் அனைத்து அரசியல்வாதிகளையும் அந்த விசயம் பாதிக்கும் என்பதை மாயாவதியின் வாழ்க்கையின் மூலம் தெரிந்துகொள்ள முடிகிறது. இந்திரா காந்தி, ராஜிவ் காந்தி, பாபர் மசூதி போன்ற விசயங்கள் மாயாவதியின் வாழ்வில் ஏற்றமும், இறக்கமும் ஏற்பட முக்கிய காரணமாக அமைந்திருக்கிறது.

பொதுவாக ஒருவரைப் பற்றி எழுதும்போது அவரைப் பற்றிய தவறான விசயங்கள் நாசுக்காக சொல்லப்பட்டு, நல்ல விசயங்கள் புத்தகம் முழுவதும் நிறைந்திருக்கும். ஆனால் இந்த புத்தகத்தில் மாயாவதியின் நேர்மறையான மற்றும் எதிர்மறையான விசயங்களை ஆசிரியர் சம அளவில் வெளிப்படையாக எழுதியிருப்பது பாரட்டத்தக்கது.

இந்த புத்தகத்தை படித்து முடித்ததும் மாயாவதியை பற்றி மட்டுமல்ல மற்ற அனைத்து அரசியல்வாதிகளை பற்றியும் அறிந்து கொள்ள வேண்டும் என்ற ஆவல் ஏற்படுகிறது. வெறுமனே அவர்களை பற்றி விமர்சனம் மட்டும் செய்து கொண்டிருக்காமல், அவர்களை பற்றி கொஞ்சமாவது தெரிந்துகொண்டு விமர்சனம் செய்வது நல்லது என்று நினைக்கிறேன். இந்த புத்தகத்தை விலைக்கு வாங்க இந்த முகவரிக்கு செல்லுங்கள் URL: http://nhm.in/shop/978-81-8493-185-3.html

Monday, December 14, 2009

சிப்பாய் புரட்சி பற்றி தெரிந்துகொள்ள விரும்புபவர்கள் எந்தவித யோசனையும் செய்யாமல் துணிந்து வாங்கலாம் இந்த புத்தகத்தை. ஒவ்வொரு பக்கத்திலும் பிரச்சனையை அடிப்படையாகக்கொண்ட இந்த புத்தகத்தை குழப்பம் இல்லாமல் எழுதிய ஆசிரியர் நிச்சயம் பாராட்டப்பட வேண்டியவரே.

அவனுக்கென்ன ராஜ வாழ்க்கை என்று நாம் பேசிக்கொள்வது வழக்கம். உதவித்தொகை வாங்கி பிழைப்பு நடத்தும் இந்த காலத்து முதியவர்கள் போல அந்த காலத்து ராஜாக்கள் ஆங்கிலேயரிடம் இந்த மாதம் இவ்வளவு தொகை எங்களுக்கு கொடுத்தால் பரவாயில்லை என கெஞ்சி கேட்டு பிழைப்பு நடத்தியதை இந்த புத்தகத்தில் படித்த பிறகு ராஜ வாழ்க்கையின் உண்மை நிலை புரிகிறது.

சில நிறுவனங்களில் பணியாளர்களிடம் அனைத்து பொருப்புகளையும் கொடுத்துவிட்டு, பணம் எவ்வளவு வருகிறது என்பதில் மட்டுமே முதலாளிகள் கவணம் செலுத்திக்கொண்டிருப்பார்கள். சில வருடங்கள் கழித்து அந்த பணியாளன் யோசித்துப்பார்ப்பான். நான் தான் வேலை செய்கிறேன், எனக்குதான் அனைத்து விசயங்களும் தெரிகிறது, பணம் மட்டும் முதலாளிக்கு போகிறது! இந்த தொழிலை ஏன் நான் தனியாக செய்யக்கூடாது என்று யோசித்து அந்த முதலாளியிடமிருந்து விலகிச்சென்றுவிடுவான். அதற்குப்பிறகு அந்த முதலாளி தன்னுடைய ஊழியன் இப்படி துரோம் செய்துவிட்டானே என புலம்பத்தொடங்குவார். அப்படித்தான் நடந்துள்ளது ஆங்கியேலர் நம் மண்ணை ஆக்கிரமித்தது. ஆங்கிலேயர்கள் நம் மண்ணில் அத்துமீறி ஆதிக்கம் செலுத்தியதாக மட்டுமே சொல்லிக்கொண்டிருக்கும் நாம் அப்போதிருந்த சூழ்நிலையைப்பற்றி பேசுவதில்லை. நாம் பேசாமல் விட்ட அந்த விசயத்தை இந்த புத்தகம் பேசுகிறது. வாகணத்தை பூட்டாமல் சாலையோரம் நிருத்திவிட்டு காணாமல் போய்விட்டதென்று சிலர் பொருப்பில்லாமல் புலம்புவார்களே அவர்களைப்போல்தான் நம் நாட்டைச்சார்ந்த மன்னர்கள் செயல்பட்டுள்ளார்கள். வரும் மாணியத்தை வாங்கிக்கொண்டு சோம்பேரித்தனமாக எந்த வேலையிலும் ஆர்வம் செலுத்தாமல் சுக வாழ்க்கையில் மட்டுமெ கவணம் செலுத்தியுள்ளார்கள் நம் மன்னர்கள். பாதுகாப்பு வேண்டுமா ஆங்கிலேயனை கூப்பிடு, அவர்களுக்கு பணம் கொடுக்க வேண்டுமா வரி வசூல் செய்துகொள்ளச்சொல் என்பதையே வழக்கமாக கொண்டிருந்தவர்களிடம் யாராக இருந்தாலும் அத்துமீறியிருப்பார்கள் என்பதுதான் உண்மை.

சுதந்திரத்திற்கான போராட்டம் என்பது, வரலாறு புத்தகத்தில் படித்த ஒருசிலரின் வாழ்க்கையோடு முடிந்துவிடுவதில்லை என்பதை அறிந்துகொள்ள முடிகிறது. ஒவ்வொரு புத்தகத்தையும் வழிநடத்திச்செல்ல புத்தகத்தில் யாராவது ஒருவர் முன்னிலை படுத்தப்படுவது வழக்கம். இந்த புத்தகத்தில் அப்படியாரும் இல்லை. இது மங்கள்பாண்டே பற்றியா புத்தகமா! என ஆச்சரியத்துடன் படித்தால் அவரது சாகாப்தம் இரண்டு மூன்று பக்கங்களோடு முற்றுப்பெருகிறது. ஒரு வேலை ஜான்சி ராணி பற்றிய புத்தகமாக இருக்குமோ! என நினைத்தால் அவரும் அப்படியே. வேறு யார்தான் புத்தகத்தில் முன்னிலை படுத்தப்பட்டிருக்கிறார்க்ள்????? புரட்சி. ஆம் புரட்சிதான் இந்த புத்தகத்தை வழிநடத்துகிறது. முதல் பக்கத்திலிருந்து இறுதி பக்கம் வரை போராளிகள் வருகிறார்கள் போகிறார்கள் ஆனால் அவர்களின் மூலமாக புரட்சி மட்டும் ஏந்திய தீபமாக கொண்டு செல்லப்படுகிறது.

கட்டபொம்மன், புலித்தேவன் போன்றோர்கள் வெள்ளையர்களுடன் மோதியது அவர்களது சொந்தப்பிரச்சனைதானே அதெப்படி சுதந்திரப்போராகும் என்று சுதந்திரம் பற்றி பேச்சு வரும்போதெல்லாம் எனக்கு ஒரு சந்தேகம் தோண்றும். அந்த விசயத்தை ஆசிரியர் இந்த புத்தகத்தில் குறிப்பிட்டு அவற்றை ஏன் சுதந்திரப்போராக எடுத்துக்கொள்கிறோம் என்பதையும் விளக்கியுள்ளது சிறப்பு.

திருவாளர் பாம்பு அவர்களே என்று மரியாதையாக அழைத்தாலும் பாம்பு நம்மை கடிக்கும் என்று ஒரு பழமொழி உண்டு. இந்த பழமொழி அந்த காலத்து ராஜாக்கள் அறிந்திருக்கவில்லைபோலும். அநியாயத்திற்கு விசுவாசமாக இருந்துள்ளார்கள். ஒரு புறம் நீங்கள் நல்ல சாப்பாடு சாப்பிடுங்கள் எங்களுக்கு கஞ்சி போதும் என சிப்பாய்களாக இருந்த நம் மக்கள் கூறுகிறார்கள் என்றால் மறுபுறம் தான் சேமித்த பணத்தை ஆங்கிலேயருக்கே கொடுத்து உதவியிருக்கிறார் ஒரு ராஜா. அளவுக்கு மீறிய விசுவாசம், மரியாதை செலுத்த காரணம் என்ன? சிறு சிறு நாடுகள் ஒன்றின் மீது மற்றொன்றுக்கு பொறாமை, போட்டி, ஒருவரை ஒருவர் அழித்துக்கொள்ளும் முயற்சி ஆகியவற்றிற்கு ஆங்கிலேயர்கள் பயன்படுத்தப்பட்டிருக்கிறார்கள். அதனால்தான் முடிவு இரண்டு கரடிகளுகு பிரச்சனையை தீர்த்துவைக்க வந்த குரங்கு கதைபோல் ஆகிவிட்டது.

ஆங்கிலேயர், இந்தியர் என்ற சமாச்சாரங்களையெல்லாம் தாண்டி ஒருவர் நம்மை கவர்கிறார். அவர் கிளைவ். இரண்டு முறை தற்கொலை முயற்சி மேற்கொண்டு பிறகு போரிலாவது தன் உயிர் போகட்டும் என ரானுவத்தில் சேர்ந்தவராம்.

கொஞ்ச நாட்களுக்கு முன்பு வரை தொழில் நுட்பத்துறை பிரபலமாக இருந்ததில்லையா அதுபோல அந்த காலத்தில் ஆங்கிலேயரின் ரானுவத்தில் பணியாற்றுவது மிகவும் விரும்பத்தக்க ஒரு தொழிலாகவும், பிரபலமான ஒரு தொழிலாகவும் கருதப்பட்டிருக்கிறது என்பது ஆச்சரியம் அளிக்கிறது. தகப்பன் மகன் பேரன் என ஆங்கிலப்படையில் பணியாற்றுவதை சந்தோஷமாக கருதியிருக்கிறார்கள். வரலாற்றில் ஒரு அழிவு ஏற்படுகிறது என்றாலே பெரும்பாலும் அங்கே ஒரு பெண் கதாபாத்திரம் இருக்கும். இங்கேயும் இருக்கிறார்கள். ஆங்கிலேயரின் மனைவிமார்கள் வடிவில். ஆசையாக பணிக்கு சென்ற நம்மவர்களுக்கும் ஆங்கிலேயருக்கும் முதல் பிரிவு ஏற்பட காரணமாக அமைந்திருக்கிறார்கள் ஆங்கிலேயரின் மனைவிகள்.

நம் நாட்டில் தற்போது நடக்கும் சில பிரச்சனைகள் படிக்கும் போது பயங்கரமாக இருக்கும். ஆந்திராவில் பிரச்சனை தமிழகத்தில் பிரச்சனை என படிக்கும்போது பெரிய பிரச்சனையாக தெரிகிறது. ஆனால் இந்த புத்தகத்தை படித்த பிறகு, அட இவ்வளவு காலம் நாம் ஒற்றுமையாக இருக்கிறோமே என்ற ஆச்சரியம்தான் மிஞ்சுகிறது. இந்து முஸ்லீம் பிரச்சனை, சீக்கியர் முஸ்லீம் பிரச்சனை என ஒருவருக்கொருவர் விரோதித்துக்கொண்டிருந்ததை படிக்கும்போது. இப்போது சில பிரச்சனைகள் ஏற்பட்டாலும் ஒற்றுமையாக இருக்கிறார்கள் என்றே தாராளமாக கருதலாம்.

புரட்சியில் நிகழ்ந்த வன்முறைக்காட்சிகளை ஆங்கிலப்படத்தில் பார்ப்பதுபோல அப்படியே விவரித்துள்ளார் ஆசிரியர். ஒரு வீட்டுக்குள் வைத்து கசாப்புக்காரர்களால் பெண்கள், குழந்தைகள் வெட்டி சாய்ப்பதாகட்டும், ஆங்கிலேயர்களை படகில் ஏற்றி வழியனுப்பிவிட்டு தப்பித்த ஒரு சிலரை தவிர அத்தனை பேரையும் அழித்து ஆற்றின் நிறத்தையே மாற்றியதாகட்டும், ஒவ்வொரு நிகழ்வுகளும் நம் கண்முன் நிருத்துகிறார் ஆசிரியர்.

காந்தியம் என்பது வறட்டு சித்தாந்தமில்லை என தமிழருவி மணியன் ஒரு கட்டுரையில் கூறியிருந்தார். அதன் அர்த்தம் அப்போது புரியவில்லை, இந்த புத்தகத்தை படித்ததும் புரிகிறது. ஒரு புரட்சியாளர், அவர் உருவாக்கிய படை, தேவையான ஆயுதங்கள் அவ்வளவுதான். ஒவ்வொருவரும் இதைக்கொண்டே போராடுகிறார்கள். ஒவ்வொரு போராட்டம் முடிந்ததும் ஒரு கேள்வி மிச்சமிருக்கிறது அனைவரிடமும் “அடுத்து என்ன செய்ய வேண்டும்” அது யாருக்கும் தெரியவில்லை. ஆட்களும் ஆயுதங்களும் போதும் என நினைத்ததால் ஒரு நூற்றாண்டு காலம் நாம் காத்திருக்க வேண்டியிருந்தது. அஹிம்சை என்றொரு காந்திய சிந்தனை தோண்றாமல் மீண்டும் புரட்சியாளர்கள், ஆயுதம் என நம் சிந்தனை சென்றிருந்தால் இன்னும் ஓர் நூற்றாண்டு நாம் காத்திருக்க வேண்டியிருந்திருக்கும். நல்ல வேலை நம் ஆயுதம் அஹிம்சையாக மாறியது. சிறப்பான இந்த புத்தகத்தை வாங்க நீங்கள் செல்ல வேண்டிய இடம் URL: http://nhm.in/shop/978-81-8493-116-7.html


Monday, December 7, 2009

சில புத்தகங்களை படிக்கும்போது லிப்டில் ஏறியது போன்ற அனுபவம் கிடைக்கும். அதாவது முதல் பக்கத்தை படித்ததும் நம்மை கடைசி பக்கத்திற்கு நம்மை அறியாமலேயே அழைத்துச் சென்றுவிடும். சில புத்தகங்கள் படிக்கட்டில் ஏறுவது போன்ற அனுபவத்தை தரும். அதாவது ஒவ்வொரு பக்கமாக கஷ்டப்பட்டு நாமாக நகர்த்திச் செல்ல வேண்டியிருக்கும். அதிகமாக மொழி பெயர்ப்பு புத்தகங்களை படிக்கும்போதுதான் படி ஏறுவது போன்ற அனுபவம் கிடைக்கும்.

சில வருடங்களுக்கு முன்பு என் வீட்டருகே கம்யூனிச கொள்கைகள், கம்யூனிச புரட்சியாளர்கள் குறிப்பாக லெனின் பற்றிய புத்தகங்களை மிகக்குறைந்த விலையில் விற்பனை செய்தார்கள். புத்தகங்களை வாங்குவதற்கு யாரும் அதிகம் ஆர்வம் காட்டவில்லை. புத்தக்கத்தின் அளவைப்பார்த்து, இவ்வளவு குறைந்த விலையில் கிடைக்கிறது ஏன் யாரும் ஆர்வம் காட்டவில்லை என யோசித்துக்கொண்டே இரண்டு புத்தகங்களை வாங்கினேன். அதை படிக்க ஆரம்பித்த பிறகுதான் ஏன் மற்றவர்கள் வாங்கவில்லை என்பது புரிந்தது. தமிழ் மொழியில் பேச, படிக்க, எழுத தெரிந்திருந்தாலும் அந்த புத்தகத்தில் என்ன சொல்லப்பட்டிருக்கிறது என்பதை கடைசிவரை புரிந்துகொள்ளவே முடியவில்லை. அதற்கு காரணம் அந்த புத்தகம் மொழி பெயர்க்கப்பட்டுள்ள விதம் அப்படி அமைந்திருக்கிறது. தமிழ் வார்த்தைகள்தான் அனால் அதற்கு பொருள் புரிந்து கொள்வதற்குள் அந்த புத்தகம் படிப்பதற்கான ஆர்வம் குறைந்துவிடுகிறது. எனவே ஒரு மொழி பெயர்ப்பு புத்தகத்தின் மீது ஆர்வம் அதிகரிப்பதும், அந்த புத்தகத்தை அலட்சியப்படுத்தப்படுவதும் மொழி பெயர்ப்பாளர்களின் கையில்தான் இருக்கிறது. முடிந்தவரை மொழிபெயர்ப்பு புத்தகத்தை படித்துக்கொண்டிருக்கிறோம் என்ற உணர்வு ஏற்படாதவாறு மொழிபெயர்ப்பது சிறப்பானதாக இருக்கும்.

கொஞ்ச நாட்களுக்கு முன் பத்ரி அவர்கள் எழுதிய கேண்டீட் புத்தகமும், உமர் என்ற புத்தகமும் படிக்க ஒரு சந்தர்ப்பம் அமைந்தது. அந்த புத்தகத்தில் வரும் கதாபாத்திரங்களின் பெயர்களை படிக்கும்போதுதான் மொழி பெயர்ப்பு புத்தகத்தை படித்துக்கொண்டிருக்கிறோம் என்ற சிந்தனை வரும் மற்றபடி கதையை பொருத்தவரையில் நேரடியான தமிழ் புத்தகத்தை படிப்பது போல ஒரே சீராக நீரோடை போல செல்லும். சரியாக முடிவெடுக்க என்ற இந்த புத்தகத்தின் முதல் பக்கத்தை படிக்கும்போதே, நாம் ஒரு மொழிபெயர்ப்பு புத்தகத்தை படித்துக்கொண்டிருக்கிறோம் என்ற உணர்வு ஏற்பட்டுவிடுகிறது. புத்தகத்தில் வரும் பெயர்கள், உதாரணங்கள், சூழ்நிலை என அனைத்திலும் நமக்கு புரிபடாத விஷயங்களாகவும், பெயர்களாகவும் உள்ளன.

எடுத்த உடனே என்ன பிரச்சனை அதற்கு என்ன தீர்வு என்று ஆரம்பிக்காமல் மெல்ல மெல்ல ஒவ்வொரு நிலையாக எழுதியுள்ளார்கள். பகுதி 1-ல் முடிவு எடுக்க தேவையான உடல் நிலை மற்றும் மன நிலை குறித்து ஆசிரியர் எழுதியிருப்பது நமக்கு பயனுள்ளதாக இருக்கும். இந்த பகுதியில் உள்ள விசயங்கள் நம் நடைமுறை வாழ்வில் நாம் அறிந்ததுதான். ஆனாலும் நாம் பின்பற்றுவதில்லை அதை பின்பற்றுவதனால் ஏற்படும் நன்மைகள் பற்றியும், பின்பற்றாததனால் ஏற்படும் எதிர்மறையான விளைவுகள் பற்றியும் அறிந்துகொள்ள இந்த பகுதி பயன்படும். தையல் மிஷின் கண்டுபிடித்தவரைப் பற்றி கூறியுள்ள விஷயம் மிகவும் உண்மையானது. ஒரு பிரச்சனையை தீவிரமாக யோசித்திவிட்டு தீர்வு கிடைக்காமல் சோர்ந்துபோய் தூங்கும்போது, விளையாடும்போது, அதாவது நம் மனம் தளர்வான நிலையில் இருக்கும் போது திடீரென நம் மனதில் குறிப்பிட்ட அந்த பிரச்சனைக்குறிய தீர்வு தோண்றும். இது அனைவருக்கும் நடக்கக்கூடிய ஒன்றுதான். ஆசிரியரின் இது போன்ற விசயங்கள் முதல் பாகத்தில் எழுதியிருப்பதால் அடுத்த அத்தியாயங்களில் எந்த மாதிரி விசயங்கள் இருக்கும் என்பதை தெரிந்துகொள்ள ஆர்வம் உண்டாகிறது.

இந்த புத்தகத்தை பொருத்தவரையில் முடிவெடுக்க தேவையான சூத்திரங்கள் என்று எதுவுமில்லை. முடிவெடுக்க தேவையான பண்புகளை என்னென்ன அதை எப்படி நாம் வளர்த்திக்கொள்வது என்பது தொடர்பான விசயங்கள் அதிகம் உள்ளன. அந்த பண்புகளை கண்டரிந்து வளர்த்திக்கொள்வது நமக்கு மிகவும் உபயோகமாக இருக்கும். ஆனாலும் சில விசயங்கள் நடைமுறைக்கு சாத்தியமில்லாத விசயங்களாகவே உள்ளன. உதாரணமாக சொல்ல வேண்டுமானால் புத்தகத்தில் வரும் “குறைவாக தவறு செய்பவர்கள் குறைவாகவே கற்றுக்கொள்கிறார்கள்” இதை நாம் செயல்படுத்த விரும்பினாலும் நாம் சார்ந்துள்ள சமூகம் அதற்கு இடம் தராது என்றே நினைக்கிறேன். ஒரு முறை தவறு செய்தாலே இனி இவனை நம்பி எதுவும் கொடுக்க இயலாது என முடிவெடுத்துவிடுகிறார்கள். கற்றுக்கொள்வோம் என்ற முடிவில் அதிகம் தவறு செய்தால் சுத்தமாக நாம் மதிப்பிழந்து போய் விடுவோம். ஆனால் அந்த வாசகம் உண்மைதான் அதை செயல்படுத்துவதுதான் சிரமம். மற்றவர்கள் சாராத நம்முடைய சொந்த விசயங்களில் வேண்டுமானால் அதிக தவறுகளை செய்து அதிகமாக கற்றுக்கொள்ளலாம். அப்படியானால் நாம் தவறுகளில் இருந்து எப்படித்தான் கற்றுக்கொள்வது. அதற்கும் இந்த புத்தகத்திலேயே ஒரு வழிமுறை சொல்லப்பட்டுள்ளது.

நம்முடைய தவறுகளில் இருந்து கற்றுக்கொள்ள முயற்சித்தால் மேற்கண்ட பிரச்சனை வரும் அதை தவிர்க்க அடுத்தவர்களின் தவறுகளில் இருந்து கற்றுக்கொள்ள மற்றொரு வழிமுறையை சொல்லிக்கொடுக்கிறது இந்த புத்தகம் இது மிகவும் சுலபமான ஒரு முறைதான். மற்றவர்களின் அனுகுமுறைகளை கூர்ந்து கவணித்து அதில் நாம் கற்றுக்கொள்ள முயற்சித்தால் அந்த அனுபவங்கள் நிச்சயமாக நமக்கு பயனுள்ள வகையில் இருக்கும் என்பதில் சந்தேகமில்லை.

புத்தகத்தில் வரும் சில உதாரணங்கள் அப்படியே நம் வாழ்வில் நிகழ்ந்ததை விவரிப்பது போல உள்ளது. கொரில்லாவை பார்ப்பதைத்தவர விடாதிர்கள் என எழுதப்பட்டுள்ள பகுதியை இதற்கு உதாரணமாக சொல்லலாம். நாம் ஏதாவது ஒன்றில் தீவிரமாக இருக்கும் போது மற்ற விசயங்களை கவணிப்பதில்லை. தீவிரமான யோசனையில் வண்டியில் செல்லும் போது எதிரில் வரும் தெரிந்தவர்களைக்கூட பார்க்காமல் சென்றுவிடுவோம். அதேபோல இல்லாத உருவங்களை பார்த்தல் தொடர்பான கட்டுரையும் அப்படியே நம் முட்டாள்தனத்தை பிரதிபளிப்பதாகவே உள்ளது. இப்படி இருக்குமோ அப்படி இருக்குமே என நாமாகவே முடிவெடுத்துக்கொண்டு பிரச்சனையை வளர்த்துக்கொண்டே செல்கிறோமே தவிர, உண்மை நிலவரம் என்ன என்பதை நாம் இறுதியாகத்தான் தெரிந்துகொள்கிறோம். இது போன்ற நம்முடைய சிறு சிறு அனுபவங்களை இந்த புத்தகத்தில் பல இடங்களில் உள்ளன.

புத்தகத்தில் உள்ள ஹெல்மெட் குறித்த சிந்தனை யாரும் யோசிக்காதது. இப்படியும் யோசிப்பார்களா என ஆச்சரியப்படவைத்தது. அரசியல் தலைவர்களில் இருந்து அடித்தட்டு மக்கள்வரை சரியாக முடிவெடுக்காததால் வாழ்க்கையையும், புகழையும் இழந்தவர்கள் ஏராளமானவர்கள் உள்ளனர். எல்லா விதமாக விசயங்களையும் சரியாக செய்துவிட்டு அதன் பலனை அடையவேண்டிய இறுதியில் முடிவெடுக்கும் திறனில் பெரும்பாலோனோர் அடிவாங்கியிருக்கிறார்கள். அப்படிப்பட்டவர்கள் இந்த புத்தகத்தில் கூறியுள்ளபடி முடிவெடுக்க தேவையான உடல் நிலை, மன நிலை, ஆளுமைப் பண்புகளை வளர்த்திக்கொண்டால், தீர்க்கமாக முடிவெடுப்பார்கள் என்பதில் சந்தேகமில்லை. இந்த புத்தகத்தை வாங்க நீங்கள் முடிவெடுத்துவிட்டால் நீங்கள் செல்ல வேண்டிய இலக்கு : URL http://nhm.in/shop/978-81-317-2963-2.html

Tuesday, November 17, 2009

சில கதாநாயகர்களின் திரைப்படங்களை பார்க்கும் போது, பிரம்மாண்டமான சண்டை காட்சிகளுடன் படம் துவங்கும், பரவாயில்லையே என்று நிமிர்ந்து உட்கார்ந்தால் சண்டைக்காட்சி முடிந்தது அந்த கதாநாயகன் தூங்கிக்கொண்டிருப்பார் அவர் கணவில் நடந்த சண்டைக்காட்சியாக சித்தரிக்கப்பட்டு இருக்கும். படத்திற்கும் அந்த சண்டைக்காட்சிக்கும் சம்பந்தம் இருக்காது. ஒரு பரபரப்பை உண்டுபன்னுவதற்காக அந்த காட்சியை சேர்த்திருப்பார்கள். சினிமா நடிகர் சம்பந்தப்பட்ட புத்தகம் என்பதாலோ என்னவோ இந்த புத்தகம் எழுதியதிலும் அந்த முறை கடைபிடிக்கப்பட்டு இருக்கிறது. ஒரு அத்தியாயத்தையே சினிமா மாதிரியான மிகைப்படுத்தலுக்காக ஆசிரியர் பயன்படுத்தியிருக்கிறார்.

விஜயகாந்தின் புத்தகம் வீட்டிற்கு வந்ததும், வீட்டில் உள்ளவர்கள் கேட்ட கேள்வி “விஜயகாந்திற்கு புத்தகமா, புத்தகம் போடும் அளவுக்கு விஜயகாந்த் வந்துவிட்டாரா???” புத்தக விசயத்தில் மட்டுமல்ல அரசியலிலும் விஜயகாந்தைப்பற்றி பல ஆச்சரியமான கேள்விகள் எழுவதுண்டு. அவர்கள் ஏற்றுக்கொண்டாலும், ஏற்றுக்கொள்ளாவிட்டாலும் நிதர்சனமான உண்மை விஜயகாந்தின் வளர்ச்சி.

விஜயகாந்தின் முந்தைய வாழ்க்கை முறைகளை பற்றி அறிந்துகொள்ள விரும்புபவர்களுக்கு இந்த புத்தகம் மிகவும் பயனுள்ளதாக இருக்கும். ஆனால் அவருடைய தற்போதைய விபரங்களை அறிந்துகொள்ள விரும்புபவர்கள் இந்த புத்தகத்தை படிக்கும் போது அதிகமான விசயங்கள் அவர்கள் அறிந்ததாகவே இருக்கும். ஏனெனில் அவையாகும் சமீபகாலத்தில் நடந்தவைகள்.

சிறு வயதில் யாரிடமும் அதிகம் பேசாமல் இருந்த விஜயகாந்த் பக்கம் பக்கமாக வசனம் பேச முடிகிறதென்றால், அதற்கான சூழ்நிலையும், பேச வேண்டிய அவசியமுள்ள தொழில் அவருக்கு அமைந்ததும் காரணமாக சொல்ல முடியும். இதை படிக்கும் போது வளர்ச்சியை விரும்பும் மக்கள் தங்களிடம் உள்ள குறைகளை நிறைகளாக மாற்றிக்கொள்ள அதற்கு ஏற்ற சூழ்நிலையில் இருக்க வேண்டும் என்று சொல்வார்கள். ஆங்கிலம் பேச விரும்புபவர்கள், ஆங்கலம் பேசும் மக்களிடம் பழக வேண்டும் என்பார்கள். ஆங்கிலம் பேச வாய்ப்பு இல்லாத நிலையில் எவ்வளவு முயற்சி செய்தாலும் ஆங்கிலம் பேசுவது சிரமமாகத்தான் இருக்கும் என்பார்கள். இந்த கூற்று உண்மைதான் என்பதை அறிந்துகொள்ள முடிகிறது.

புத்தகத்தை படித்துக்கொண்டு வரும்போது சில இடங்களில் நம்மை ஆச்சரியப்படுத்தும் விசயங்கள் உண்டு. அதில் முக்கியமானவை விஜயகாந்தின் ஆரம்ப கால காதல். ஜன்னலோரம் எட்டிப்பார்ப்பது, கண்களால் பேசிக்கொள்வது, காதலின் கட்டளைக்கு ஏற்ப மாற்றமடைவது என சினிமாவில் நடிக்க ஆரம்பிப்பதற்கு முன்பாகவே பல படங்களை ஓட்டியிருக்கிறார் விஜயகாந்த். அந்த படமும் தோல்வியில் முடிந்திருக்கிறது. அதற்குப்பிறகும் இரண்டு காதல் படங்களை வெளியிட்டு இருக்கிறார் ஆனால் அவற்றின் விபரங்கள் இல்லையாம். நம்மை அறியாமலேயே நாம் சிரிக்கும் பக்கங்கள் இவை.

நம்ம ஊருக்கு தொடர்பில்லாத நபர்களின் வாழ்க்கை முறை பற்றி படிக்கும் போது, அவர்களின் சிறு வயது வாழ்க்கை முறை நமக்கு தொடர்பில்லாததாக இருக்கும். மற்றொருவரின் வாழ்க்கையை படிக்கிறோம் என்ற உணர்வுதான் இருக்கும். ஆனால் விஜயகாந்த் நம்மைப்போன்ற சராசரி மனிதர் என்பதால் அவருடைய சிறு வயது வாழ்க்கையை படிக்கும்போது அட! இவரும் நம்மைப்போன்ற ஆள்தானா! என்ற ஆச்சரிய்ம் ஏற்படுகிறது. கில்லி விளையாடுவது, பள்ளிக்கூடம் செல்லாமல் கோலி விளையாடுவது, காத்தாடி விடுவது, பல்பம் மிட்டாயை சிகரெட் பிடிப்பது போல வாயில் வைத்துக்கொண்டு விளையாடுவது என அத்தனையும் சராசரி வாசகர்களின் சிறுவயதில் நிகழ்திருப்பதால் இவற்றை படிக்கும் போது அவர்களின் முகத்தில் மெல்லிய புன்னைகை பூப்பது நிச்சயம்.

சினிமாவில் கூட நடக்காத ஒரு அதிசயம் விஜயகாந்த் வாழ்க்கையில் நிகழ்ந்துள்ளது. அது அவருக்கு கிடைத்த இரண்டாவது அம்மாவும் அன்பானவராக அமைந்தது. இரண்டாவதாக வந்த அம்மாவின் குணம் சற்று எதிர்மறையானதாக அமைந்திருந்தால் விஜயகாந்தின் வாழ்க்கையில் திரைக்கதை வேறு விதமாக அமைந்திருக்கும் என்பதில் சந்தேகமில்லை. ஆனால் அதிர்ஷ்ட வசமாக அவரும் பெற்ற தாயைப்போல அன்பு செலுத்தியிருக்கிறார். விஜயகாந்தின் வளர்ச்சிக்கு இது கூட ஒரு முக்கியமாக காரணம் என்று சொல்லலாம்.

நம்மை ஆச்சரியப்படுத்தும் மற்றொரு விசயம் விஜயகாந்த், இப்ராஹிம் ராவுத்தர் நட்பு, கொஞ்ச நாளைக்கு முன்பு ஒரு பேட்டியில் இதோ இவன் என் நன்பன் எங்களுக்குள் எந்தவித மதரீதியான பாகுபாடும் கிடையாது என சொல்லியிருந்தார். சரி சினிமா ரீதியான நட்பு என நினைத்திருந்தேன் ஆனால் படிக்கிற காலத்தில் இருந்து, சினிமா துறைக்கு வந்து கஷ்டப்படும்போது ஒன்றாக கஷ்டப்பட்டு, இன்று வரை நன்பர்களாக இருக்கிறார்கள் என்பது உண்மையிலேயே பெரிய விசயம்தான்.

ஒரு சினிமா நடிகன் அரசியலுக்கு வந்துவிட்டார் என்ற விமர்சனத்தின் மூலம் விஜயகாந்தின் அரசியில் வாழ்க்கை நேற்று ஆரம்பித்தது போன்ற ஒரு பிம்பம் உள்ளது. ஆனால் அவரது சிறுவயதிலிருந்தே அவருக்கு அரசியில் தொடர்பு இருந்திருக்கிறது. அவருடைய அப்பா மூலமாக, அரசியல் சிந்தனைகளும், மக்கள் தொடர்பு சிந்தனைகளும் அவருக்கு ஆரம்பத்திலிருந்தே இருக்கிறது என்பது தெரிகிறது.

விஜயகாந்திடம் பிடித்தமான விசயம் அவருடைய துணிவு மற்றும் தீர்க்கமான முடிவுகள். நான் வருவேன், வரமாட்டேன், வெளியில் இருப்பே, ஓரமா இருப்பேன் இந்த மாதிரி பேச்சு எங்கிட்ட கிடையாது ”நான் கண்டிப்பாக வருவேன்” என்று ஒரு படத்தில் தான் அரசியலுக்கு வருவது பற்றி வசனம் பேசுவார், அப்படித்தான் அவருடைய செயல்பாடுகள் இதுவரை இருந்துள்ளன. ஒவ்வொரு முறை அவருக்கு கிடைக்கும் வாக்கு எண்ணிக்கைகள் அதிகரிக்கும்போது மற்ற கட்சிகளால் இதனால் தான் அவருக்கு வாக்கு எண்ணிக்கை அதிகரித்தது, அதனால்தான் வாக்கு எண்ணிக்கை அதிகரித்தது என ஒவ்வொரு காரணம் கூறப்படுகிறது. அவர் வளர்ச்சிப்பாதையில் இருக்கிறார் என்ற நிதர்சனமான உண்மையை யாராலும் ஜீரணித்துக்கொள்ள முடிவதில்லை..

விஜயகாந்தை பற்றிய இந்த புத்தகம் கூட விஜயகாந்த் படம் பார்ப்பதுபோல்தான் இருக்கிறது. சண்டைக்காட்சிகள், சில காதல் காட்சிகள், ஆவேசமான போரட்டங்கள், அரசியல் கலம் என ஒரு விஜயகாந்த் படத்தை நம் கண்முன் நிருத்துகிறார். புத்தக்த்தில் அவ்வப்போது வரும் சண்டைக்காட்சிகளை ஆசிரியர். சினிமாவில் வரும் சண்டை போலவே விவரித்துள்ளார். இந்த புத்தகத்தை விலைக்கு வாங்க இந்த (URL) முகவரிக்கு செல்லுங்கள்: http://nhm.in/shop/978-81-8493-118-1.html